22/02 Cátedra de San Pedro

PRIMEIRA 1 Pe 5, 1-4

Copresbítero e testemuña da pasión de Cristo

PROCLAMACIÓN DA PALABRA RECOLLIDA NA PRIMEIRA CARTA DE SAN PEDRO APÓSTOLO

5 1Ós responsables das vosas comunidades, exhórtoos eu, responsable coma eles, que fun testemuña dos padecementos de Cristo e que terei parte convosco na gloria que está para se manifestar:

2coidade o rabaño de Deus, que está á vosa garda; mirade por el, non por pura obriga senón, como Deus quere, de boa gana; nin por baixos intereses de lucro senón porque vos agrada; 3nin dándovolas de señores dos que se vos encomendaron senón facéndovos exemplo para o rabaño. 4Así, cando apareza o supremo Pastor, recibiréde-la coroa da gloria, que nunca murcha.

SAL. RESP. Sal 22, 1-3a. 3b-4. 5. 6

R/: (1): O Señor é o meu pastor: nada me falta.

1O Señor é o meu pastor: nada me falta.

2Os pastos verdecentes lévame a repousar,

lévame a beber ás augas tranquilas:

3El repón as miñas forzas.

Guíame por vereas rectas,

por mor do seu nome.

4Se tiver de pasar por vagoadas sombrizas,

ningún mal temería, pois ti vas comigo:

o teu bastón e o teu caxato son o meu sosego.

5Ti pos para min a mesa,

á cara dos meus inimigos;

únxesme con perfume a cabeza,

e a miña copa reborda.

6A túa bondade e o teu amor vanme seguindo

tódolos días da vida.

Eu habitarei na casa do Señor

ó longo dos meus días.

ALELUIA

(V/ Aleluia)

V/ Ti es Pedro, e sobre esta pedra

vou edifica-la miña Igrexa,

e as portas do inferno non prevalecerán

en contra dela.

(R/: Aleluia)

EVANXEO Mt 16, 13-19

Ti es Pedro, e dareiche as chaves do Reino dos Ceos

PROCLAMACIÓN DO SANTO EVANXEO SEGUNDO MATEO

13Cando chegou Xesús á comarca de Cesarea de Filipo preguntoulles ós seus discípulos:

-¿Quen di a xente que é o Fillo do Home?

14Eles responderon:

-Uns, que Xoán Bautista; outros, que Elías; outros, que Xeremías ou algún dos profetas.

15Insistiu:

-E vós, ¿quen dicides que son?

16Respondeu Simón Pedro:

-Ti e-lo Mesías, o Fillo de Deus vivo.

17E Xesús contestoulle:

-Ditoso ti, Simón, fillo de Xonás; porque iso non cho revelou ninguén de carne e sangue, senón meu Pai que está no ceo. 18E eu asegúroche que ti es Pedro, a pedra, e

sobre esta pedra vou edifica-la miña Igrexa; e as portas do Inferno non prevalecerán en contra dela. 19Dareiche as chaves do Reino dos Ceos: todo o que ates na terra, ficará atado nos ceos; e todo o que desates na terra, ficará desatado nos ceos.

Na Misa votiva de San Pedro dinse as anteriores lecturas

Quero ter un recordo especial ós meus compañeiros da primeira CXD da nosa diócese de Tui-Vigo:

P.José Luis Rodríguez

Josefa (a "presi")

Esther

Xosefa e Ramón (de Sárdoma)

Marce e María (de Tameiga)

Anxo e Olga (do Cristo da Victoria)

Tali e Toya (parroquia de S.Francisco)

Ollea

Antonio (Porriño)

César (e máis eu, de Maristas)

e, máis tarde,

Raquel (do Sagrado Corazón)

Emilio

que me aprenderon a ser Igrexa, Igrexa galega, sen decatarme.

Un bico da "secre", a que suscribe, Nuria.

22/02 Cátedra de San Pedro

Contacto